Ақтөбе облысында тұрғын үйлер мен әлеуметтік нысандарды салуға қажетті құрылыс материалдарының шамамен 70 пайызы өңір кәсіпорындарында өндіріледі. Бұл туралы облыс әкімі Асхат Шахаров хабарлады.
Оның айтуынша, қазіргі таңда облыстың құрылыс саласында 380-нен астам компания жұмыс істейді. Олар тұрғын үйлермен қатар мектептер, балабақшалар, ауруханалар мен спорт кешендерін салып, өңірдің әлеуметтік инфрақұрылымын жаңғыртуға өз үлесін қосып келеді.
«Құрылыс – бұл жай ғана жаңа ғимараттар емес, бұл – халықтың өмір сүру сапасын арттыру, қолайлы орта қалыптастыру және өңірдің болашағына салынған сенімді инвестиция. Ақтөбе облысы осы бағыттағы жүйелі жұмыстарын жалғастырып, қарқынды дамудың жаңа кезеңіне нық қадам баса бермек», – дейді облыс әкімі.
Облыс басшысының пайымынша, Ақтөбе облысы – Қазақстанның ең ірі әрі қарқынды дамып келе жатқан өңірлерінің бірі. Бүгінде бұл тек еліміздің маңызды өнеркәсіптік орталығы ғана емес, сонымен қатар ауқымды құрылыс алаңына айналған аймақ.
Соңғы үш жылда облыста 1 триллион теңгеден астам құрылыс жұмыстары орындалды. Биылғы жылдың алғашқы алты айында құрылыс жұмыстарының көлемі 162,3 миллиард теңгені құрап, былтырғы жылдың сәйкес кезеңімен салыстырғанда 15,2 пайызға артты.
Жыл соңына дейін тағы 308 миллиард теңгеден астам құрылыс жұмыстарын орындау жоспарланып отыр.
