Ақтөбе облысында көктемгі су тасқынына дайындық жұмыстары қызу жүріп жатыр. «Қазсушар» мекемесінің жергілікті филиалы өңірдегі үш ірі су қоймасын тасқын суды қауіпсіз қабылдауға толық дайындады, деп хабарлайды "Тілші" облыс әкімдігіне сілтеп.
Мамандар су қоймаларының қауіпсіздігін күшейтіп, жүйелерді жаңартты.
Сыйымдылық жеткілікті
Қазіргі таңда Ақтөбе, Қарғалы және Сазды су қоймаларында келетін суды ұстап қалу үшін молынан бос орын қарастырылды. Нақтырақ айтсақ, Ақтөбе су қоймасының 58 пайызы немесе 141 миллион текше метрі бос тұр. Қарғалы су қоймасында бұл көрсеткіш 68 пайызды (192 миллион текше метр) құраса, Сазды су қоймасында 61 пайыздық немесе 4,5 миллион текше метрден астам бос кеңістік сақталған. Бұл көлем көктемгі еріген қар суын еш қауіпсіз қабылдауға толық мүмкіндік береді.
Тарихи реконструкция және дабыл жүйесі
Көктемгі маусым алдында аталған үш стратегиялық нысанға көпфакторлы кешенді тексеру жүргізіліп, арнайы қауіпсіздік декларациялары әзірленді. Ерекше атап өтетін жайт, Ақтөбе және Сазды су қоймалары пайдалануға берілген сәттен бастап тарихта алғаш рет кешенді реконструкциядан өтті.
Төтенше жағдайдың алдын алу үшін барлық нысандар облыстық Төтенше жағдайлар департаментінің орталық басқару пультіне қосылған жергілікті хабарлау жүйесімен жабдықталды. Сонымен қатар мамандар бұл жүйелердің бағдарламалық жасақтамасын жаңартып, байланысты үзбеу мақсатында қосымша радиостанциялар сатып алды.
Тәулік бойғы күзет пен қырағылық
«Қазсушар» кәсіпорнының Ақтөбе облысындағы филиал директоры Ринат Шауенов қазіргі уақытта барлық су қоймалары штаттық режимде жұмыс істеп тұрғанын және жағдай қатаң бақылауда екенін мәлімдеді.
«Филиалымыз тасқын қаупінің алдын алуға және оның салдарын азайтуға бағытталған кешенді алдын алу шараларын тұрақты түрде жүргізіп келеді. Стратегиялық маңызы бар нысандарда тәулік бойы кезекшілік ұйымдастырылып, режимдік және күзет шаралары қамтамасыз етілген. Барлық су шаруашылығы нысандарында инертті материалдар дайындалған, сондай-ақ жанар-жағармай қоры бар резервтік дизель генераторлар қарастырылған. Қазіргі уақытта барлық су қоймалары штаттық режимде жұмыс істеп тұр, су шаруашылығы жағдайы тұрақты бақылауда», – деді Ринат Шауенов.