Ақтөбе қаласындағы ойын-сауық орындарының бірінде өткен «Құқықтық тәртіп» жедел-профилактикалық іс-шарасы барысында бірқатар өрескел заң бұзушылық анықталды. Бұл туралы Polisia.kz порталына сілтеме жасап хабарлаймыз.
Полиция қызметкерлерінің тексеруі кезінде клуб ішінен тыйым салынған заттар мен суық қару табылды.
Атап айтқанда:
- Ерлер дәретханасынан есірткіге ұқсас 3 орам;
- Металл кастет пен 2 жиналмалы пышақ;
- Бар сөресінің маңынан 4 кальян тәркіленді.
Бұдан бөлек, түн жарымында көңіл көтеру орнында 17 жастағы жасөспірімнің жүргені белгілі болды. Осы деректер бойынша мекеме әкімшілігіне ҚР Әкімшілік құқық бұзушылық туралы кодексінің бірден үш бабымен хаттама толтырылды. Олар: кәмелетке толмағандардың түнгі уақытта мекемеде болуына жол беру (132-бап), темекі өнімдерін (кальян) тұтынуға тыйымды бұзу (441-бап, 1-бөлік) және алкоголь сату талаптарын сақтамау (200-бап, 1-бөлік). Заң бұзушылық мұнымен шектелмеген. Тексеріс барысында мекеменің күзет қызметкерлері ешқандай еңбек шартынсыз жұмыс істеп келгені әшкереленді. Рейд қорытындысы бойынша жалпы саны 17 адам полиция бөліміне жеткізілді. Тәркіленген күдікті заттар тиісті сараптамаға жолданды. Қазіргі таңда тыйым салынған заттардың заңсыз айналымына қатысы бар тұлғаларды анықтау мақсатында тергеу амалдары жүргізіліп жатыр.
Тәртіп сақшылары қоғамдық қауіпсіздікті қамтамасыз ету мақсатында ойын-сауық орындарындағы мұндай тексерулердің тұрақты түрде жалғасатынын ескертеді.
