2026 жылдың қыркүйегінде Ақтөбе қаласында Қазақстанның Қытай кәсіпкерлері қауымдастығының Батыс орталығы құрылды. Жаңа алаңның ашылғаны туралы ҚХР-дың Ақтөбедегі консулдығы ұйымдастырған баспасөз туры барысында белгілі болды.
Жаңа алаң еліміздің бүкіл батыс өңірінде жұмыс істейтін қытайлық бизнес өкілдерінің басын қосады. Батыс орталығының негізгі өкілдерінің бірі – Қазақстан мұнай жабдықтары зауытының (ҚМЖЗ) бас директоры Гэ Хаофэй. Қауымдастық қытайлық инвесторлар мен жергілікті компаниялардың өзара байланысын орнататын басты диалог алаңына айналуды көздейді.
Ұйымның негізгі міндеттерінің бірі – өңірдегі шетелдік бизнестің тәжірибелік және құқықтық мәселелерін шешуге жәрдемдесу. Жұмыстың басым бағыттарының қатарында – жергілікті мемлекеттік органдармен және бейінді құрылымдармен жүйелі түрде өзара іс-қимыл орнату бар. Сондай-ақ қауымдастық қытайлық және қазақстандық кәсіпорындар арасындағы сауда-өндірістік байланыстарды дамытуға үлес қосуға ниетті.
Батыс орталығының құрылуы осы макроөңірдегі Қытай-Қазақстан экономикалық ынтымақтастығының айтарлықтай жандануымен тікелей байланысты. Орталық өкілдері қазірдің өзінде Ақтөбенің өндірістік кәсіпорындарымен және іскерлік қоғамдастық өкілдерімен жұмыс кездесулерін өткізіп жатыр. Алдағы уақытта Қауымдастық өзара іс-қимыл аясын кеңейтіп, бүкіл Батыс Қазақстандағы қытайлық инвесторлардың мүддесін кешенді түрде ұсынуды жоспарлап отыр.
Бірлестіктің жаңа қатысушыларын қолдау мақсатында жобаларды жылдам жүзеге асыру үшін дайын инфрақұрылым ұсыну қарастырылған. Атап айтқанда, ҚМЖЗ аумағында инвесторларға тегін негізде берілетін кеңсе бөлмелері дайындалды.
Орталық жұмысында тілдік кедергіні жоюға және жергілікті мамандарды оқытуға ерекше назар аударылған. Конфуций институтымен бірлесіп, өндірістік және әкімшілік қызметкерлерге арналған техникалық және тілдік дайындықтың арнайы бағдарламалары іске асырылуда. Бұдан бөлек, орталық кәсіпорындарға стандарттау мен сертификаттаудан өтуге көмектеседі, бұл технологиялар трансфертін тездетіп, экономикадағы жергілікті қамту үлесін арттыруға ықпал етеді.
