«СНПС-Ақтөбемұнайгаз» АҚ-да қызметкерлердің денсаулығын сақтау, спортпен айналысуға жағдай жасау және сауықтыру демалысын ұйымдастыруға бағытталған әлеуметтік бағдарлама жүзеге асырылады. Бұл жұмыстарды компания әкімшілігі кәсіподақ комитетімен бірлесіп жүргізеді.
Жаңажол және Кеңқияқ вахталық кенттерінде спорт залдары мен ашық спорт алаңдары бар. Ақтөбеде компания қызметкерлер үшін спорт кешендері мен бассейндерді жалға алады. Жыл сайын Мұнай-газ кешені қызметкерлері күніне орай корпоративтік спартакиада өткізіледі.
Шамамен 5 мың қызметкер ауысымдық, жарты жылдық және жыл сайынғы медициналық тексеруден өтеді. Компанияның бас кеңсесінде медициналық пункт жұмыс істейді. Сонымен қатар «Медикер», «Шипагер» сияқты клиникалармен келісімшарт жасалған. Олардың мамандары өндірістік нысандарда медициналық қызмет көрсетіп, оқу-жаттығуларға қатысады.
Кәсіподақ комитеті қызметкерлерге санаторий-курорттық емделуге жолдамалар береді. Жолдамалар медициналық көрсетілімдері бар және сауықтыру демалысына ниет білдірген қызметкерлерге ұсынылады. Негізінен Қазақстан аумағындағы шипажайлар таңдалады.
